Çmimi i naftës së papërpunuar në tregjet ndërkombëtare pësoi të tjera luhatje gjatë orëve të fundit.
Këtë të Martë, çmimi varionte mes 112 Dollarëve për fuçi në bursën e Teksasit dhe deri në 116 dollarëve për fuçi në atë të Londrës, dy pikave kryesore të referencës për tregun perëndimor.
Bëhet fjalë për një rritje me 6 deri 9 Dollarë, krahasuar me një javë më parë kur u shënua edhe niveli më i ulët i këtij muaji, gjatë të cilit ndikimin kryesor në luhatjen e çmimit të naftës bruto e pati sulmi rus në Ukrainë.
Rritja më e fundit pasqyron shqetësimet e tregjeve se Bashkimi Europian mund të ndërpresë importin e naftës ruse, si ndëshkim ndaj Rusisë për këtë sulm.
Liderët europianë mblidhen të Enjten dhe të Premten në Bruksel, për të diskutuar për çmimet e larta të energjisë dhe ndikimin e tyre tek qytetarët e vendeve të unionit.
Liderët e Gjermanisë dhe Francës e kanë bërë të qartë megjithatë se bllokimi i importit të naftës dhe gazit rus do të bëhet gradualisht, pasi të sigurohen kontrata me vende të tjera eksportuese.
Ministri gjerman i Energjisë Robert Habek nisi këtë javë turin e tij në Emiratet e Bashkuara dhe Katar në përpjekje për të lidhur kontrata afatgjata për energjinë, në vazhdim të përpjekjeve për shkëputjen e Bashkimit Europian nga varësia energjitike prej Rusisë.
