Çmimet e naftës dhe benzinës janë rritur sërish gjatë ditës së sotme, me 10 lekë për litër, duke reflektuar ndryshimet e çmimeve të karburanteve në tregjet ndërkombëtare.
Sipas burimeve për Monitor, Bordi i Transparencës ka vendosur sot që një litër naftë do të tregëtohet me 243 lekë, nga 233 lekë që ishte deri sot, sipas vendimit që ishte marrë në datën 27 prill. Ky është niveli më i lartë që nga data 26 mars.
Rritje ka shënuar edhe benzina, që do të tregtohet me 223 lekë, nga 213 lekë që ishte deri tani. Ndërsa gazi është rritur me dy lekë për litër, në 106 lekë.
Aktorët e tregut pohojnë se arsyet e shtrenjtimit lidhet me rritjen e karburantit në bursat ndërkombëtare, që ka arritur në 1200 dollarë për ton. Edhe në këto nivele që po tregtohet nga ne, ata pohojnë se çmimet e bordit janë nën kosto dhe prej tre ditësh ata po operonin me humbje.
Çmimi në bursa është momentalisht 1200 dollarë për ton, por, sipas tregtuesve të karburanteve, nëse ai e kalon 1240 dollarë për ton, që njihet dhe si pikë e rezistencës, nafta në tregun vendas mund të arrijë deri në 300 lekë për litër.
Lufta në Ukrainë solli rritje të fortë të çmimit të naftës në fillim të marsit, ndërsa qeveria ngriti Bordin e Transparencës për kontrollin e çmimeve dhe parandalimin e abuzimeve.
