Shënon rritje numri i vdekjeve që janë shkaktuar nga dhuna në Maqedoni, tregojnë të dhënat më të reja të Entit Shtetëror të Statistikave.
Në vitin 2015 ka pasur 4,2% më shumë raste të vdekjes nga dhuna krahasuar me një vit më parë dhe ky numër arrin në 513. Sociologët shprehen se jeta dinamike në të cilën jetojmë dhe pamundësia e një pjese e qytetarëve për t’u socializuar në këtë shoqëri rezulton me veprime vetëvrasëse dhe vrasëse.
Madje 31 për qind të rasteve të vdekjes nga dhuna janë regjistruar te fëmijët nën moshën 14-vjeçe. Psikologët të cilët punojnë në Ambasadën e fëmijëve “Megjashi” shprehen se prindërit në të shumtën e rasteve vendosin të ngrenë dorë mbi fëmijën e tyre për të tentuar që t’i shpëtojnë nga realiteti i hidhur, por edhe për shkak të çrregullimeve psikike.
“Në Republikën e Maqedonisë varfëria ende është pengesa më e madhe për realizimin e të drejtave të fëmijëve, prandaj prindi në këtë mënyrë tenton ta shpëtojë fëmijën e vet nga gjendja reale ose e paramenduar e hidhur që i pret më tutje”, tha Angela Manevska nga “Megjashi”.
Sipas strukturës, madje 72,1% të të vdekurve nga dhuna në Maqedoni janë burra. Ekspertët këshillojnë që në rast se vërehen çrregullime psikike te një person, të sigurohet me kohë trajtimi përkatës me qëllim që të evitohen pasojat fatale.
