Kreu i agjencisë kufitare të Bashkimit Evropian (FRONTEX), Fabrice Leggeri deklaroi se numri i emigrantëve që hyjnë në Evropë nga Turqia u rrit ndjeshëm gjatë vitit të kaluar.
“Në vitin 2019 më shumë se 82.000 emigrantë u përpoqën të hyjnë pa autorizim në Evropë, një rritje prej 46% krahasuar me një vit më parë”, tha Leggeri.
Kjo rritje, sipas tij, vinte kryesisht si pasojë e situatës në Siri, por edhe paqëndrueshmërisë në Afganistan dhe ndryshimit të politikave ndaj shtetasve afganë nga ana e autoriteteve iraniane dhe pakistaneze.
BE-ja ra dakord në vitin 2016 t’i jepte Turqisë deri në 6 miliardë euro për të përballuar fluksin e sirianëve, si dhe për të bindur qeverinë në Ankara që të ndalë emigrantët që nisen për në Greqi. Megjithatë që nga vera e vitit 2019, ishujt lindorë të Greqisë janë përballur me mbipopullim të kampeve të refugjatëve.
Presidenti turk, Reccep Tayip Erdogan, ka thënë se vendi i tij nuk mund të marrë përsipër i vetëm barrën e pritjes së 3.6 milionë refugjatëve sirianë dhe në të kaluarën ka kërcënuar se do të “hap portat” për emigrantët që të shkojnë drejt Evropës./Opinion.al
