Një aksion policor në 50 vendodhje argjendarish të Kosovës ka çuar në sekuestrimin e 26 kilogramë ari dhe 33 kilogramë argjend që dyshohet se kanë qënë kontrabandë.
Ndërsa të dhënat zyrtare të zhdoganimit të arit flasim për shifra tepër të vogla në krahasim me sasinë që zotërojnë argjendarët nëpër dyqane.
Zëdhënësi i Doganave të Kosovës, Adriatik Stavileci thotë se në Kosovë zhdoganohen sasi të vogla të arit për gjatë një viti, rreth dy kilogramë. Ai thotë se ari është produkt shumë i lehtë dhe i kontrabandueshëm pasi sasia e vogël ka vlerën e lartë.
“Ari është një sfidë kryesore e Doganave të Kosovës. Kryesisht janë sasi të vogla që zhdoganohen dhe ne si dogana gjithmonë e kemi adresuar”, ka thënë Stavileci për Indeksonline.
Ndërsa në Kosovë në bazë të dhënave zyrtare të Agjencisë së Regjistrimit të Bizneseve ushtrojnë veprimtarinë 534 tregtarë që tregtojnë ar dhe argjend.
Nga kjo rezulton se shumica e arit nëpër argjendari është kontrabandë në mënyra të ndryshme. Gjatë vitit 2012 në Kosovë janë zhdoganuar 2 kilogram ari, ndërsa vitet paraprake edhe më pak.-shkruan Express.
