Ashtu sikurse është bërë e ditur nga Ministria e Turizmit, këtë vit stacione plazhi mund të menaxhojnë vetëm strukturat akomoduese që plotësojnë kriteret.
Për këtë sezon turistik veror raporti mes plazheve publike dhe atyre private është 50/50.
“Këtë vit kemi vënë re një raport të thyer në raport me vitet e tjera që është ajo 50% me 50%, plazhe të menaxhuara nga plazhe publike. Është një lajm i mirë për atë që zgjedhin nëse duan të pushojnë në një zonë ku është e menaxhuara me të gjitha kushtet dhe kriteret e rregullores së plazheve.
Po, jo më ndryshe do të jenë edhe ato stacione, të cilat do të kenë një lirshmëri në zgjedhjen e pushuesve, nëse duan të vendosin çadrat e tyre apo shezllonet e tyre”,tha Drejtoresha e Përgjithshme e Turizmit, Herida Duro.
Për një sezon turistik sa më të sigurt dhe me standarde, do të bashkëpunojnë 25 institucione si pjesë e Task-Forcës.
“Jo vetëm sigurinë e rendit publik, por edhe sigurinë ushqimore, sigurinë e shëndetit, të qendrave mjekësore. Dhe, për më tepër 25 institucione janë pjesë e Task- Forcës, të cilët kanë bashkërenduar një plan masash rigoroze. Nga bregdeti më verior të Shqipërisë deri në Sarandë dhe Ksamil”, tha Duro.
Vitet e fundit rritje po njohin edhe flukset turistike nga tregjet më të largëta si Australia apo dhe vendet aziatike që preferojnë Shqipërinë.
“Australia, Amerika, Japonia, së fundmi Kina, Izraeli, e të tjera vende plotë, e shohin Shqipërinë si një përvojë interesante, autentike”, tha Duro.
Vetëm gjatë 4 muajve të parë të 2025 vendin tonë e kanë vizituar mbi 2.45 milionë turistë dhe pritshmëritë për muajt e verës mbetën tepër të mëdha./Klan News
