Numri i fëmijëve të mitur të prekur nga fruthi është rritur ndjeshëm gjatë muajit janar, ku numërohen 11 raste të reja. Instituti i Shëndetit Publik konfirmon në total janë 41 fëmijë me virusin e fruthit. Shumica e të infektuarve janë nga Tirana dhe në moshë foshnjore, 0-2 vjeç, të pavaksinuar.
Gjithashtu nuk mungojnë edhe rastet ku sëmundja është marrë jashtë Shqipërisë, përkatësisht 3 vijnë Greqia dhe 1 nga Kosova, raporton Tv Klan.
Fruthi konsiderohet një sëmundje infektive, e cila mund të shkaktojë komplikacione të rënda deri në humbjen e jetës. Si pasojë e këtyre komplikacioneve, një javë më parë një foshnje 4 muajshe ndërroi jetë në Spitalin Pediatrik në Qendrën Spitalore Universitare Nënë Tereza.
Mjekët thonë se vaksinimi mbetet forma e vetme e mbrojtjes nga kjo sëmundje. Vaksina e fruthit, injektohet tek fëmijët në dy doza, 1 dhe 5 vjeç. Fruthi u rikthye në vendin tonë një vit më parë ku shënoi mbi 1000 të prekur dhe tre vdekje./Ri-De
