Bota

Rritet bilanci i viktimave në Libi, Europa me dy qëndrime


               Publikuar në : 09:05 - 15/04/19 |
b.f

121 të vdekur dhe 561 të plagosur. Është ky bilanci i luftimeve në Libi, qëkur komandanti Khalifa Haftar nisi sulmin në fillim të këtij muaji për të marrë kontrollin e Tripolit.

Të dhënat janë bërë publike nga gazeta egjiptiane “Ahram” duke iu referuar Organizatës Botërore të Shëndetësisë. Nga ana tjetër, nga radhët e ushtrisë së Haftarit kanë humbur jetën mbi 100 persona që prej 4 prillit.

Që prej rrëzimit të Gadafit, Libia nuk ka gjetur paqe politike. Fillimi i luftës vjen edhe për shkak të mungesës së një qëndrimi të përbashkët europian, pasi Franca mbështet komandatin Khalifa Haftar ndërsa Italia përkrah kryeministrin në detyrë Fayez Mustafa al-Sarraj.

Prej disa ditësh është mbyllur edhe aeroporti i Tripolit, ndërsa të shtunën forcat e Haftarit goditën një shkollë, por fatmirësisht pa plagosur asnjë. Sipas të dhënave të OKB-së, mbi 1,000 persona janë mbyllur në kampet e qëndrimit për emigrantët pranë vendluftimeve, pa ujë të pijshëm dhe në kushte shumë të vështira higjienike./Opinion.al

Pas