1700 thirrje janë realizuar në 24 orët e fundit drejt Urgjencës Kombëtare ku gjatë këtyre ditëve po vërehet një rritje e lehtë e numrit të qytetarëve, që kërkojnë suport në numrin 127. Ky informacion është bërë i ditur nga Ministria e Shëndetësisë që njofton se janë 5.693 qytetarë të prekur nga virusi SARS COV2 të cilët kanë marrë trajtim nga Urgjenca Kombëtare, qe ne nisje te pandemise.
Gjatë një takimi me ekipet e reja të urgjencës, Ministrja e Shëndetësisë Ogerta Manastriliu tha se ekipet e terrenit të urgjencës po dyfishohen.
“Dyfishojmë ekipet e terrenit të urgjencës kombëtare, për t’u përballuar edhe me një sfidë tjetër, që është sfida e trajtimit në banesë sipas protokolleve të reja që po miraton Komiteti Teknik i Ekspertëve për trajtimin në shtëpi të rasteve ambulatore. Padyshim vjeshtë-dimri nuk do të jetë i lehtë por jemi përgatitur brenda mundësive tona, jo vetëm me kapacitetet që disponojmë por edhe me stafin e shtuar, ku edhe gjatë periudhës së epidemisë janë 45 personel që i janë bashkuar ekipit të Urgjencës Kombëtare, si edhe mbështetja logjistike nuk ka munguar dhe nuk do të mungojë. Edhe 36 autoambulanca të reja do t’i shtohen Urgjencës Kombëtare brenda vitit për të garantuar një shërbim më të mirë, më të shpejtë për qytetarët, sidomos në situatën e epidemisë”, tha Manastirliu.
Drejtori i Urgjencës Kombëtare, Skënder Brataj tha se në bashkëpunim me mjekun e familjes, do të integrohet shërbimi në banesë.
“Në bashkëpunim me mjekun e familjes dhe linjës 08004040 që bën lidhjen e menjëhershme me mjekun e familjes, do të integrojmë shërbimin në banesë. Në momentin që pacienti përkeqësohet ose në momentin që pacienti ka marrë një kurim të përcaktuar nga specialisti mund të bëhen trajtime në banesë. Prej 3 vitesh ne kemi setin e plotë të urgjencës dhe i kemi të gjitha pajisjet. Kemi porositur të gjitha medikamentet që kemi porositur në bazë të protokollit përsa i përket trajtimit dhe të formës së mesme nga ekipet tona”, tha Brataj.
Qendra Kombëtare e Urgjencës Mjekësore ka pritu 571.990 thirrje dhe ka kryer mbi 103.117 mijë misione gjatë muajve të epidemisë. Janë 5.693 qytetarë të prekur nga virusi SARS COV2 që kanë marrë trajtim nga Urgjenca Kombëtare nga të cilat 2.895 në banesë dhe 2.798 janë transferuar në spital./Opinion.al
