Bota

Rriten tensionet mes Britanisë dhe Iranit


               Publikuar në : 16:24 - 21/07/19 |
el ida

Britania e Madhe ka dënuar konfiskimin e anijes së saj në Gjirin Persik nga Teherani duke theksuar se ajo ka qenë duke operuar në mënyrë ligjore në territorin e Omanit, kur u rrethua nga forcat iraniane.

Këto komente vijnë pas publikimit të një videoje nga Garda Revolucionare e Iranit, ku shihen duke rrethuar cisternën e naftës.

Sekretarja e Mbrojtjes në Britani, Penny Mordaunt, tha se konfiskimi i anijes Stena Impero, ka qenë veprim armiqësor, ndërsa sekretari i Jashtëm, Jeremy Hunt u shpreh i zhgënjyer gjatë një telefonate me homologun iranin, Mohammad Javad Zarif, i cili tha se anija duhet të kalojë nëpër procedura ligjore para se të lirohet.

Marrëdhëniet mes Iranit dhe Perëndimit janë acaruar pas konfiskimit nga autoritetet britanike të cisternës Grace 1 që kontrollohej nga Irani më 4 korrik, nën dyshimet se po bënte transportin e naftës në Siri, në kohën e sanksioneve nga shtetet evropiane.

Udhëheqësi suprem i Iranit, Ayatollah Ali Khamenei, ka deklaruar se Teherani do të hakmerret ndaj konfiskimit të cisternave nga ana e autoriteteve britanike, ndërsa cisterna iraniane dhe ekipi i saj vazhdojnë të jenë nën kontrollin e autoriteteve të Gjibraltarit.

Ngjarjet në Ngushticën e Hormuzit, një nga pikat më të rëndësishme të tregtisë ujore në botë, kanë rritur tensionet në mes të Teheranit dhe Perëndimit, gjë që ka rritur frikën për ndonjë konflikt të mundshëm të armatosur./Opinion.al

 

Pas