Los Anxhelesi do të rivendosë sërish masën për mbajtjen e maskave. Vendimi vjen për shkak të rritjes së rasteve nga varianti Delta që tanimë ka filluar që të bëhet më shumë dominues.
Rikthimi i maskave vlen për 10 milionë njerëz të Los Anxhelesit të cilët duhet ta mbajnë atë në mjediset publike dhe bizneset, pavarësisht nga statusi i vaksinimit.
Mandati do të hyjë në fuqi në 17 Korrik. Në vetëm gjashtë ditët e fundit numri i rasteve është rritur në më shumë se 1 mijë, ndërsa me gati 400 njerëz të shtruar në spital.
Qarqe të tjera të Kalifornisë dhe shtete të tjera po përballen gjithashtu me një rritje të rasteve të koronavirusit, kryesisht nga varianti Delta dhe duke prekur kryesisht njerëzit që nuk janë vaksinuar.
Sacramento dhe Fresno Counties në Kaliforni rekomanduan që maskat të mbaheshin në ambiente të mbyllura edhe nga njerëzit që vaksinohen. Autoritetet në Texas, u bëri thirrje njerëzve që nuk janë të vaksinuar të shmangin udhëtimet, tubimet në ambiente të mbyllura, darkat jashtë si dhe të mbajnë maska.
Të dhënat nga CDC tregojnë nivele të larta të transmetimit të koronavirusit në shumë shtete, përfshirë Misuri, Misisipi, Florida, Nevada dhe Utah./ Klan News
