Përveç ankthit dhe depresionit, ekspertët vërejnë së fundmi një shtim të personave që vuajnë nga çrregullimet e varësisë ndaj substancave.
“I kemi vënë theksin shumë ankthit dhe depresionit, kjo dhe për shkak të pandemisë, por kemi një sërë çrregullimesh të tjera që janë goxha prezente, do përmendja çrregullimet e varësisë, kemi të shtuar varësinë ndaj drogave, bixhozit, alkoolit që është kthyer në një problematikë mjaft të dukshme dhe te gratë dhe vajzat.”
Problemet e shëndetit mendor sipas ekspertëve të fushës prekin çdo grupmoshë, madje së fundmi janë shtuar edhe rastet tek fëmijët.
“Kemi edhe fëmijë, që prindërit i sjellin, mosha të vogla 10, 9 vjeç që shfaqin probleme të ankthit zakonisht.”
Pasiguria sipas ekspertëve është burimi kryesor i këtyre çrregullimeve.
“Pasiguria është burim ankthi. Në momentin e parë që shikoni një problematikë që po na ndikon cilësinë e jetesës sonë, po na ndikon punën, stilin e jetesës, prindërimin, shkollimin, duhet të drejtoheni te një specialist.”
Rastet në rritje të këtyre problematikave reflektohen edhe nga shtimi i pacientëve në spitalet psikiatrike. Në muajt janar-prill të këtij viti u regjistrua një dyfishim i numrit të pacientëve, në krahasim me një vit më parë. Në botë sipas organizatës botërore të shëndetësisë 1 në 8 persona vuajnë nga një çrregullim i shëndetit mendor.
