Numri i kontribuuesve në skemën e sigurimeve shoqërore për vitin 2024 shënoi rritje me 3%, por nga ana tjetër është rritur edhe raporti i të moshuarve ndaj popullsisë në moshë pune.
Sipas Institutit të Sigurimeve Shoqërore, numri i të punësuarve që kanë kontribuar direkt në skemë arriti në 805 mijë e 416 persona, 22 mijë e 164 më shumë se në vitin 2023.
Por, ndërsa ka një përfshirje më të gjerë në sistem dhe një rritje të të ardhurave, të dhënat e INSTAT nxjerrin në pah sfidën e plakjes së shpejtë të popullsisë.
Raporti i varësisë së të moshuarve është rritur në 33.3%, nga 31.1% që ishte në janar të vitit 2024.
Kjo do të thotë se për çdo 100 persona në moshë pune, ka rreth 33 të moshuar që varen ekonomikisht nga kontributet e tyre.
Rritja e raportit të varësisë rrezikon të ushtrojë presion mbi skemën e pensioneve në të ardhmen, sidomos nëse emigracioni dhe rënia e lindshmërisë thellohen./ Tv Klan
