N/Kryetari i Këshillit Bashkiak të Lezhës ka rënë pre e dhunës nga dy vëllezër. Mësohet se Agostin Marku 54 vjeç është goditur nga dy vëllezërit, K.N. 21 vjeç dhe S.N. 18 vjeç, të dy banues në Lezhë, të cilët janë shpallur në kërkim nga policia.
Ngjarja, sipas policisë, ka ndodhur ditën e djeshme rreth orës 13:30 në lagjen Skënderbe të Lezhës, para një lokali. Dy vëllezërit kanë qëlluar me mjete të forta duke i shkaktuar dëmtime, nënkryetarit të këshillit.
Pas ndihmës së nevojshme mjekësore në Spitalin Rajonal Lezhë, Agostin Marku ndodhet jashtë rrezikut për jetën.
Dy vëllezërit e shpallur në kërkim akuzohen për veprat penale “Kanosje”, “Dëmtime të tjera me dashje” dhe “Goditje për shkak të detyrës”.
Për këtë ngjarje ka reaguar lideri i opozitës, Lulzim Basha i cili tha mbrëmjen e djeshme se Agustin Marku u godit me grushte dhe shkelma nga ish-deputeti i PS, Arben Ndoka. “Rama vazhdon t’i falet Arben Ndokës, i cili vazhdon të jetë njishi sot në Lezhë. Ai ka rrahur edhe një socialist atje”, tha Basha.
Njoftimi i plotë i policisë
Më datë 20.02.2017, u referuan materialet hetimore në Prokurorinë e Rrethit Gjyqësor Lezhë dhe punohet për kapjen e shtetasve: K.N. 21 vjeç dhe S.N. 18 vjeç, të dy banues në Lezhë. Këta 2 shtetas dyshohet se rreth orës 13:30, në lagjen Skënderbeg të qytetit Lezhë, para një lokali, për motive të dobëta kanë goditur me mjete të forta, shtetasin A.M. 54 vjeç, banues në Lezhë, me detyrë N/Kryetar i Këshillit të Qarkut Lezhë. Pas ndihmës së nevojshme mjekësore në Spitalin Rajonal Lezhë, shtetasi A.M ndodhet jashtë rrezikut për jetën. Materialet procedurale për dy vëllezërit u referuan Prokurorisë së Rrethit Gjyqësor Lezhë për veprat penale “Kanosja”, “Dëmtime të tjera me dashje” dhe “Goditje për shkak të detyrës”, parashikuar nga nenet 84, 90 dhe 237 të Kodit Penal.
