GJKKO ka rrëzuar kërkesën e ish-kryeministrit, Sali Berisha për përjashtimin e gjyqtares Irena Gjoka.
Gjoka do të vijojë të drejtojë seancën gjyqësore ndaj ish-Kryeministrit për çështjen e privatizimit të ish-kompleksit “Partizani”.
Ky vendim erdhi pasi ditën e sotme avokati Genc Gjokutaj, në një prononcim për gazetarët tha se ata kanë kërkuar përjashtimin e gjyqtares Irena Gjoka.
“Bëmë kërkesë paraprake për përjashtimin e gjyqtares Irena Gjoka. Është depozituar kërkesa, është zhvilluar me kërkimin tonë, pra humbjen e fuqisë së masës së sigurimit. Janë bërë prapsimet e prokurorit dhe është ndërprerë seanca për të shqyrtuar kërkesat për përjashtim edhe për të na dhënë një kopje të akteve të prokurorisë në lidhje me objektin e kërkimit. Seanca është shtyrë për orën 15:30”.
I pyetur se cilat janë argumentet me të cilat ata kërkojnë përjashtimit e gjyqtares në shqyrtimin e kësaj kërkese, Gjokutaj tha: “Absolutisht ajo ka detyrë të heqë dorë, ajo nuk e bëri këtë veprim, pasi në vitin 96 kjo gjyqtare është shkarkuar nga detyra nga KLD-së i asaj kohe, i cili kryesohej nga zoti Berisha në cilësinë e kryetarit të KLD, si president i republikës”.
Kjo është hera e dytë që ish-kryeministrit Berisha i rrëzohet kërkesa për përjashtimin e gjyqtares Irena Gjoka.
Kujtojmë se Sali Berisha është person nën hetim për dosjen “Partizani” dhe akuzohet për veprat penale “Korrupsion pasiv i funskionarëve të lartë ose të zgjedhurve vendorë kryer në bashkëpunim, parashikuar nga neni 260 dhe 25 i K.Penal”.
Kujtojmë se për Sali Berishën është vendosur masa e sigurisë detyrim paraqitje dhe ndalim i daljes jashtë vendit, ndërsa dhëndëri i tij, Jamarbër Malltezi është arrestuar po për këtë çështje.
