PARIS- Rrëzohet kërkesa e Kosovë për t’u anëtarësuar në UNESCO. Pro Kosovës në UNESCO votuan 92 vende, por për t’u miratuar duheshin 95 vota. Po kështu Kundër Kosovës kanë votuar një pjesë e shteteve latinoamerikane, si dhe shumë shtete me shumicë myslimane. Argjentina dhe Brazili kanë votuar kundër. Emiratet e Bashkuara Arabe, Katari, Jordania, Kuvajti, Egjipti, Maroko, Palestina, Indonezia, Siria e Libia, janë vendet me shumicë muslimane të cilat kanë votuar kundër Kosovës në UNESCO.
Më herët u hodh në votim dhe u rrëzua kërkesa e Serbisë për shtyrjen e anëtarësimit të Kosovës. Gjatë debatit pro dhe kundër shtyrjes së votimit për anëtarësimin e Kosovës janë përplasur me argumente përfaqësues të shteteve mbështetëse përfshirë edhe SHBA e cila e ka humbur të drejtën e votës.
Përfaqësuesi i Britanisë së Madhe ka theksuar se asnjëherë nuk ka ndodhur që Konferenca e Përgjithshme të refuzojë propozimin e Këshillit Ekzekutiv të UNESCO, që do të ishte precedent. Vendeve kundërshtuese Rusisë, Argjentinës, Kubës i janë përgjigjur SHBA’të, Britania e Madhe dhe Gjermania.
