Një autobus me udhëtarë është aksidentuar ditën e sotme në vendin e quajtur “Dedesh” në Komunën e Pejës. Nga ky aksident ka pasur me dhjetra të lënduar, të gjithë udhëtarë në autobusin e aksidentuar.
Lajmin është konfirmuar nga zëdhënësi i Policisë së Kosovës për Rajonin e Pejës, Xhevat Ibraj, i cili ka theksuar se personat e lënduar janë jashtë rrezikut për jetën dhe janë dërguar për trajtim më të specializuar në Spitalin rajonal të Pejës për trajtim mjekësor.
Ndërkohë që nuk jepen detaje në lidhje me shkaqet që çuan në këtë aksident.
Zëdhënësi i spitalit rajonal të Pejës, Naim Sahiti, ka thënë se spitali i Pejës ka shpallur gjendje të jashtëzakonshme
“Në spitalin e Pejës kanë arritur për trajtim 31 pacientë që janë me lëndime të ndryshme pas fatkeqësisë së komunikacionit. Asnjë nga pacientët nuk është në rrezik për jetë dhe aktualisht 24 pacientë janë duke u trajtuar me kujdes të veçantë. Lëndimet janë të formave të ndryshme, kryesisht fraktura të gjymtyrëve, lëndime në fytyrë dhe pjesë të tjera të trupit”, theksoi Sahiti.
