Pas rrëzimit të kandidaturës së tretë të Presidentit Ilir Meta për kreun e Kontrollit të Lartë të Shtetit, Petraq Milo, nga ana e mazhorancës, ka reaguar Presidenca.
Zëdhënësi i Presidentit Meta, Tedi Blushi, i është përgjigjur kreut të grupit parlamentar të PS, Taulant Balla, i cili tha sot në Kuvend se kandidaturat e Metës janë të papërshtatshme.
Përmes një postimi në “Facebook” Blushi ironizon Ballën, duke thënë se ka të drejtë që i quan kandidaturat e Metës të papërshtatshme, pasi asnjë prej tyre nuk ka qenë i dënuar më parë jashtë vendit për trafik droge, trafik prostitucioni apo vjedhje banesash.
“Tao Tao ka të drejtë që kandidaturat e propozuara nga Presidenti Meta për Kryetar të Kontrollit të Lartë të Shtetit janë të papërshtatshme, pasi asnjë prej tyre nuk ka qenë i dënuar më parë jashtë vendit për trafik droge, trafik prostitucioni apo vjedhje banesash. Po kështu asnjë prej tyre nuk e ka marrë diplomën e shkollës së lartë, pa bërë fare të mesmen. Presidenti Meta është i paaftë të propozojë kandidatë me rekorde kaq pozitive që do garantonin hapjen e negociatave në 18 tetor 2019 me ovacione nga të gjitha vendet anëtare”, shkruan zëdhënësi i Metës.
Kandidatura e Petraq Milos treta që rrëzohet nga mazhornca, pasi para tij Meta ka propozuar gjyqtaren Vitore Tusha dhe të këshilltarit të tij, Bahri Shaqiri./ Opinion.al E.Xh.
