Një avion pasagjerësh Boeing 737, që mbante 62 persona në bord besohet se u rrëzua në det, pak pas ngritjes nga kryeqyteti i Indonezisë Xhakarta.
“Sriwijaya Air” u zhduk nga radarët katër minuta nga nisja e udhëtimit të tij për në Pontianak në provincën Perëndimore, Kalimantan. Sipas faqes së internetit të ndjekjes së fluturimit Flightradar24.com, avioni mendohet të ketë humbur më shumë se 3,000m lartësi në më pak se një minutë kohë. Dëshmitarët thanë se ata kishin parë dhe kishin dëgjuar të paktën një shpërthim.
Peshkatari Solihin, i tha shërbimit indonezian të BBC se kishte parë një përplasje dhe kapiteni i anijes së tyre vendosi të kthehej në tokë.
“Avioni ra si vetëtima në det dhe shpërtheu në ujë,” tha ai. “Ishte shumë afër nesh, copat e një lloj kompensate të tij, gati sa nuk goditën anijen time”, u shpreh.
Ndërkohë banorët e një ishulli afër vendit ku u zhduk avioni, i thanë BBC se kishin gjetur objekte që mendonin se ishin të tij. Ministria e Transportit tha se përpjekjet e kërkimit dhe shpëtimit janë duke vijuar.
Raportohet se tashmë flota indoneziane është në kërkim të avionit. Zyrtari i Marinës Abdul Rasyid, i tha agjencisë së lajmeve Reuters se kishin përcaktuar koordinatat e avionit dhe anijet ishin vendosur aty.
Kontakti i fundit i avionit ishte në orën 14:40 me kohën lokale, sipas ministrisë së transportit. Koha e zakonshme e fluturimit për në Pontianak, në perëndim të ishullit Borneo, është 90 minuta.
Avioni nuk dërgoi asnjë sinjal alarmi, sipas kreut të agjencisë kombëtare të kërkimit dhe shpëtimit ajror, mareshall Bagus Puruhito.
Raportohet se në bord ishin 50 pasagjerë – përfshirë shtatë fëmijë dhe tre foshnje – dhe 12 persona të ekuipazhit, ndonëse avioni ka kapacitet prej 130 vende. Zyrtarët thanë se të gjithë personat në bord ishin indonezianë. Familjarët e udhëtarëve kanë pritur me ankth në aeroportin e Pontianak.
“Unë kam katër anëtarë të familjes në avion – gruaja ime dhe tre fëmijët”, u tha Yaman Zai gazetarëve mes lotësh. “Gruaja më dërgoi një fotografi të foshnjës sot … Si mund të mos më copëtohej zemra?”, u shpreh ai./Opinion.al
