Pas ndalimit që më shumë se pesëdhjetë vende i bënë fluturimeve të avionëve Boeing 737 Max, edhe vetë kompania amerikane ka vendosur të pezullojë fluturimet e gjithë flotës së kësaj serie.
Duket se vendimi i presidentit amerikan Donald Trump ditën e djeshme për të ndaluar fluturimet Boeing 737, ka nxitur edhe këtë vendim të kompanisë.
“Ne e mbështesim këtë hap proaktiv për më shumë siguri. Po bëjmë gjithçka në bashkëpunim me hetuesit që të kuptojmë se pse ka ndodhur ky aksident dhe jemi të vendosur për të përmirësuar sigurinë që një gjë e tillë të mos përsëritet kurrë”, ka thënë Dennis Muilenburg, Presidenti i kompanisë Boeing.
Ky vendim ka ardhur pas rrëzimit të avionit “Boeing 737 Max 8” në Etiopi disa ditë më parë, dhe rrëzimit të avionit “Boeing 737 Max 9” në Indonezi para pesë muajsh. Kompania Boeing këto ditë po përjeton krizën më të rëndë në historinë e saj, ku kuotat në bursë kanë rënë në minimumin e mundshëm.
Sipas CNN, mëngjesin e të enjtes kutia e zezë pritet të mbërrijë Paris, ku edhe do të analizohet duke i dhënë përgjigje jo vetëm familjarëve të viktimave, por edhe gjithë opinionit publik për aksidentin që i mori jetën 157 udhëtarëve./Opinion.al
