Tjetër ndalim antiterrorizëm në Francë. Një çift nga Montpellier, në jug të Francës është ndaluar pasi gruaja kishte blerë në internet një bark shtatzënie fals që dyshohet se do të përdorej për një sulm kamikaz. Ajo një 23vjeçare franceze e konvertuar në Islam, ai një 35vjeçar me origjinë nga Çadi. Në shtëpi u gjet edhe barku fals për eksplozivin. Edhe në 15 dhjetor, 23vjeçarja e konvertuar në Islamin më radikal dhe bashkëshorti i saj 35vjeçar ishin ndaluar për mbështetje të terrorizmit në një hetim lokal, raporton Midi Libre. Më pas u liruan dhe iu dha një masë detyrimi, një lloj lirie e vëzhguar, e parashikuar nga gjendja aktuale e jashtëzakonshme e shpallur në Francë. Ajo thotë se donte vetëm të vidhte në supermarkete. Barku fals që është gjetur në shtëpinë e çiftit, ishte zbrazur tërësisht nga përmbajtja plastike dhe ishte mbuluar me letër alumini. Gruaja e quajtur Camille u ka shpjeguar agjentëve që i duhej për të vjedhur në supermarkete. Gjatë hetimit, është zbuluar gjithashtu që kishte bërë kërkime të shumta në internet për Shtetin Islamik dhe gratë kamikaze. Dosja i është transmetuar gjykatësve antiterrorizëm të Parisit. Sipas hetuesve, gruaja kishte shprehur dëshirën të bënte Jihad dhe të vdiste si martire në Siri./ BW
