Ministria e Shëndetësisë ka njoftuar se në Rripin e Gazës kanë humbur jetën 493 persona si pasojë e bombardimeve nga Izraeli. Ndërkohë 2751 palestinezë të tjerë kanë mbetur të plagosur.
Ndërkaq, Organizata e Kombeve të Bashkuara thonë se 123,538 njerëz në Gaza janë zhvendosur brenda vendit, kryesisht “për shkak të frikës, shqetësimeve për mbrojtjen dhe shkatërrimit të shtëpive të tyre”.
Zyra për Koordinimin e Çështjeve Humanitare (OCHA) shtoi se 73,000 njerëz janë strehuar në shkolla.
Adnan Abu Hasna – zëdhënës i agjencisë së OKB-së për refugjatët palestinezë (UNRWA) – pret që shifra të rritet.
“Ka rrymë në këto shkolla, ne u ofrojmë ushqim, ujë të pastër, mbështetje psikologjike dhe trajtim mjekësor”, thotë ai.
Në Gaza jetojnë 2.3 milionë palestinezë. Para se të niste sulmet ajrore hakmarrëse të shtunën, Izraeli paralajmëroi njerëzit që jetonin në zona të caktuara të largoheshin.
“Po i them popullit të Gazës: largohuni prej andej tani, sepse ne jemi gati të veprojmë kudo me gjithë forcën tonë”, tha të shtunën kryeministri izraelit Benjamin Netanyahu.
