Policia e Tiranës ka arrestuar ditën e sotme dy shtetas, të cilët dyshohen se kanë rrëmbyer dhe kanë ushtruar dhunë fizike ndaj një 20-vjeçari në Tiranë.
Gjithashtu blutë e kryeqytetit kanë vënë në pranga edhe një 28-vjeçar për mos kallëzim krimi në Polici.
Në pranga kanë rënë shtetasit D. B., 36 vjeç, dhe E. H., 31 vjeç, të cilët u kallëzuan në polici nga 20-vjeçari, i cili iu tha hetuesve se këto dy persona e kishin marrë peng dhe e kishin dhunuar në mënyrë të vazhdueshme.
Ngjarja dyshohet se ka ndodhur për motive të dobëta në sheshin “Skënderbej”.
Njoftimi i policisë:
I hoqën lirinë një shtetasi dhe ushtruan dhunë ndaj tij, arrestohen 2 shtetas, shpallet në kërkim bashkëpunëtori i tyre.
Gjithashtu, u arrestua 1 shtetas tjetër që ka patur dijeni për ngjarjen, por nuk e ka kallëzuar në Polici.
Specialistët për Hetimin e Krimeve të Komisariatit të Policisë Nr. 1, pas kallëzimit të marrë ditën e sotme nga një 20-vjeçar, se 3 shtetas i kishin hequr lirinë dhe kishin ushtruar dhunë ndaj tij, menjëherë kanë organizuar punën për kapjen e tyre.
Si rezultat:
– u arrestuan shtetasit D. B., 36 vjeç, dhe E. H., 31 vjeç, dhe u shpall në kërkim shtetasi H. P., 19 vjeç, për veprën penale “Heqja e paligjshme e lirisë”;
– u arrestua shtetasi T. K., 28 vjeç, për veprën penale “Moskallëzimi i krimit”.
Shtetasit D. B., E. H. dhe H. P., dyshohet se për motive të dobëta, kanë marrë me forcë në sheshin “Skënderbej”, një 20-vjeçar, ndaj të cilit kanë ushtruar dhunë në mënyrë të vazhdueshme, ndërsa shtetasi T. K. ka patur dijeni për ngjarjen, por nuk e ka kallëzuar atë në Polici.
Materialet i kaluan Prokurorisë.
