Raportet mes Kosovës dhe Serbisë shënuan një përshkallëzim të tensioneve, teksa një ditë më parë 3 policë të Kosovës u kapën nga forcat serbe.
Lidhur me ngjarjen nga reaguar edhe KFOR, që përmes një deklarate shprehet se ka dërguar një ekip në zonë dhe u kërkon palëve të ulin tensionet.
“Misioni i KFOR-it i drejtuar nga NATO nuk ishte në zonë kur tre policë të Policisë së Kosovës u arrestuan dje nga Policia e Serbisë. KFOR-i ka dërguar një ekip në zonë dhe ka vendosur kontakte me përfaqësuesit e institucioneve në Kosovë dhe të autoriteteve serbe. KFOR-i është gjithashtu në kontakt të rregullt me misionin e udhëhequr nga BE-ja për Sundimin e Ligjit, EULEX. Ne u bëjmë thirrje të dyja palëve që të ulin menjëherë tensionet dhe të përmbahen nga veprimet e njëanshme që mund të çojnë në përshkallëzim të mëtejshëm”, thuhet në deklaratë./Opinion.al
