Bashkimi Evropian ka dënuar Bjellorusinë që ditën e djeshme detyroi një avion të Ryanair të kryente një ulje emergjente në Minsk, për shkak të një alarmi të rremë për bombë, në mënyrë që të arrestonte një gazetar disident rus që fluturonte nga Athina në drejtim të Lituanisë.
Në përgjigje të veprimit, liderët evropianë të mbledhur sot dhe nesër në Bruksel po diskutojnë për “sanksionet e mundshme” që do të vendosin për Bjellorusinë.
“Ne kërkojmë lirimin e menjëhershëm të gazetarit dhe aktivistit Roman Protasevich. Në zbatimin e këtij akti shtrëngues, autoritetet Bjelloruse kanë rrezikuar sigurinë e pasagjerëve dhe ekuipazhit”.Kjo ishte deklarata e përfaqësuesit të Lartë të BE-së Josep Borrell.
“Është e nevojshme të kryhet një hetim ndërkombëtar për këtë ngjarje. Për të konstatuar çdo shkelje të rregullave ndërkombëtare të aviacionit – shton Borrell -. Kjo situatë do të ngrihet në takimin e ardhshëm të Këshillit Evropian. BE do të vlerësojë pasojat e këtij veprimi, duke përfshirë miratimin e masave ndaj përgjegjësve “.
Një takim është thirrur për nesër në nivelin e ambasadorëve të NATO-s për të bërë një vlerësim të situatës. “Aleatët po këshillohen për uljen e detyruar të avionit Ryanair nga Bjellorusia dhe ambasadorët do ta diskutojnë atë nesër,” thotë një burim i NATO-s, raporton ANSA.it.
Ministri i Jashtëm Irlandez, Simon Coveney, e cilësoi rrëmbimin nga autoritetet Bjelloruse të një avioni që i përkiste kompanisë irlandeze Ryanair si një akt “piraterie” shtetërore. “Ishte në të vërtetë një akt piraterie i sponsorizuar nga shteti,” i tha Coveney radios publike irlandeze, RTE duke bërë thirrje për “sanksione”./Opinion.al
