Policia e Durrësit ka gjetur një automjet tip “Range Rover” të djegur në Shkallnur. Dyshimet janë se automjeti u përdor gjatë rrëmbimit të 49-vjeçarit Jak Prenga, dy ditë më parë në Kamëz. Deri tani policia nuk ka ende asnjë të dhënë mbi vendndodhjen e tij.
Autorët, ende të paidentifikuar pasi u konfliktuan me Prengën teksa ky i fundit po hipte në mjetin e tij, e morën me dhunë dhe e futën në makinën e tyre.
Kamerat e sigurisë në zonë zbuluan se autorët u larguan me një mjet tip “Range Rover” me ngjyrë të bardhë. Pas verifikimeve të kryera, burime pranë policisë sqaruan se mjeti në fjalë rezultonte i denoncuar si i vjedhur.
Ngjarja ndodhi rreth orës 11:44 minuta të së premtes në rrugën “London” në Kamëz, e ndërsa mjeti i dyshuar i përdorur nga autorët është fiksuar të largohet në drejtim të Fushë-Krujës.
Për policisë rrëmbimi i 49-vjeçarit me origjinë nga Puka e banues në Bathore mbetet ende një mister, pasi Jak Prenga nuk rezulton të jetë person me precedent të mëparshëm penalë. Në vendngjarje policia gjeti vetëm një mjet tip “Benz”, për të cilin u raportua se i përket Jak Prengës, si dhe një këpucë. /Opinion.al
