Dy nga katër amerikanët e rrëmbyer nga një grup i armatosur në Meksikë javën e kaluar, kanë vdekur dhe dy janë ende gjallë, ka thënë një guvernator i shtetit meksikan.
Katër shtetas amerikanë u rrëmbyen nga njerëz të armatosur më 3 mars teksa po udhëtonin drejt qytetit Matamoros në shtetin verilindor të Tamaulipas, Meksikë përtej kufirit nga Teksasi.
Ata kishin udhëtuar në atë vend për të bërë kirurgji estetike, thanë të afërmit për mediat amerikane.
Zyrtarët amerikanë ende nuk e kanë konfirmuar vdekjen.
Zyra e Prokurorit të Përgjithshëm të Meksikës konfirmoi se nga katër amerikanët, “dy prej tyre janë të vdekur, një person është plagosur dhe tjetri është gjallë”, tha guvernatori i Tamaulipas, Americo Villarreal, gjatë një konference për shtyp.
Një zyrtar meksikan shtoi për Reuters se dy burra ishin gjetur të vdekur, ndërsa një tjetër burrë dhe një grua ishin të sigurt dhe në duart e autoriteteve.
Partneri i medias amerikane i BBC-së, raportoi se amerikanët ishin Latavia “Tay” McGee, Shaeed Woodard, Eric James Williams dhe Zindell Brown.
Të katër po udhëtonin përmes Matamoros një qytet me 500,000 banorë që ndodhet direkt përtej kufirit nga qyteti i Broënsville në Teksas. Ata ishin me një furgon të bardhë me targa të Karolinës së Veriut kur persona të armatosur të paidentifikuar hapën zjarr, tha FBI këtë javë./Opinion.al
