Gjatë seancës gjyqësore në Krimet e Rënda ndaj Denis Shtrazës i akuzuar për rrëmbimin dhe vrasjen e Gazmend Çollakut ka dëshmuar edhe ish-e fejuara.
Ajo i tha gjykatës se përpara ngjarjes kishin drekuar në Golem dhe se rrëmbimin e kishte mësuar nga policia.
“Unë e njoh Denis Shtrazën”- shtoi dëshmitarja- “sepse jetojmë në të njëjtën lagje dhe nuk di që mes tij dhe Gazmendit të kishte konflikte”, raporton TCH.
Po kështu edhe 3 dëshmitarët e tjerë që ndodheshin në lokalin ku u rrëmbye Gazmendi, thanë në gjykatë se nuk kanë parë asgjë.
Sipas tyre është dëgjuar vetëm një krismë dhe më pas kanë parë një automjet duke u larguar me shpejtësi.
Të enjten Gjykata e Krimeve të Rënda do të vijojë me dëgjimin e tre dëshmitarëve të tjerë. Ata janë oficerë policie, të cilët pas rrëmbimit të Çollakut dhe dyshimeve për përfshirje në ngjarje edhe të Ervin Dalipajt, ata treguan në polici një version tjetër.
Sipas tyre ata kanë qenë duke pirë kafe me Ervin Dalipaj, për të cilin gjykimi është pushuar pas atentatit qe i mori jetën.
