Një prind shqiptar, i cili nuk ka preferuar të identifikohet, ka rrëfyer sonte në “Neës 24”, historinë e lënies së djalit të mitur, 15-vjeç, në një nga vendet e BE-së.
Ai tha se e la djalin në një stacion treni derisa erdhën policët për t’a marrë. Prindi shqiptar tregoi se veproi në atë mënyrë për t’i dhënë djalit një jetë më të mirë.
“E çova në një vend të BE për një jetë më të mirë dhe e lashë në një stacion treni derisa erdhi policia që e mori. E dërgova kur ishte 15 vjeç, ndërsa për pak muaj ai mbush 18 vjeç. Më merr malli shumë, por më duket sikur më ka harruar. Edhe sikur të dua unë është e vështirë për të që të kthehet këtu në Shqipëri”- tregon babai.
Ndër të tjera ai shprehet disi i penduar për veprimin e tij dhe thotë se nëse do kishte një fëmijë tjetër nuk do e çonte sërish. Ai thotë se djali studion në një shkollë profesionale.
“Djali studion në një shkollë profesionale dhe pas shkollimit ka mundësi për të punuar atje. Nëse do kisha një fëmijë tjetër nuk do e çoja sërish. Flas në telefon 3 herë në muaj dhe kam 7 muaj pa e takuar”- ka thënë ai.
