Në një intervistë të dhënë për “La gazeta dello sport” trajneri i kombëtares shqiptare, Xhani de Biazi zbulon se kur nisi ta ndjekë nga afër mbrojtësin e Frozinones, Arlind Ajetin. Italiani tregon se kanë mjaftuar 10 minuta në ndeshjen ndaj Çelsit që mbrojtësi të binte në syrin e tij.
“E pashë atë për herë të parë në ‘Stamford Bridge’ në shtator 2013, kur Bazeli fitoi 2-1 kundër Çelsit. Arlindi hyri në lojë në 10 minutat e fundit të ndeshjes dhe e kreu punën mirë. Nga atëherë fillova ta ndjek edhe pse e dija që nuk luante shumë me Bazelin.
Ne vendosëm ta marrim tek Shqipëria pasi kishte luajtur me të gjitha grupmoshat e Zvicrës. Ai është një mbrojtës agresiv, i pastër dhe pa faulle. Ta kalosh atë një për një është shumë e vështrë. Unë kam qenë dhe jam shumë i bindur në cilësitë e tij, prandaj ia sugjerova trajnerit të Frozinones Roberto Stellones”, deklaron De Biazi.
Përveç Ajetit, De Biazi ndalet edhe te mbrojtësi i Napolit Elseid Hysaj për të cilin thotë se nuk ka nevojë për shumë koment. “Për Hysajn kam pak për të shtuar, pasi ai tashmë është një lojtar i gatshëm për nivele më të larta dhe këtë po e tregon tek Napoli.
Nëse nuk do të kenë ata problem fizike, Arlindi dhe Elseidi do të jenë 100 për qind pjesë e Kombëtares në Francë. Ajeti në Frozinone nuk ka luajtur menjëherë, sepse është dashur të kthehet në formë, por nëse Stellone e aktivizon atë rregullisht, për mua do të ishte një gjë e mirë”, përfundoi trajneri kuqezi. (Panoramasport)
