Ende nuk ka asnjë të arrestuar për rrahjen e biznesmenit libanez Faad Mitri, ndonëse kanë kaluar më shumë 24 orë nga ngjarja.
Pasditen e së shtunës më kryqëzimin e Laknasit, në rrugën e Rinasit, biznesmeni u dhunua nga njerëz që besohet se i kanë thënë “Ik nga Shqipëria”.
Mësohet se policia e Tiranës dhe ajo e Durrësit kanë shoqëruar 15 persona, të cilët mund të kenë dijeni për ngjarjen e rëndë.
Sipas policisë, nga hetimet e para si dhe nga dëshmia që vetë i dëmtuari ka dhënë para oficerëve të policisë ka rezultuar se biznesmeni ka qenë duke bërë fotografi në objekte të ndryshme gjatë rrugës. Këtë gjë e ka provuar edhe aparati fotografik i 54vjeçarit, ku në disa foto shfaqej edhe automjeti tip “Volkswagen”, ku ndodheshin autorët”.
Mitri ka sqaruar se u ka bërë foto pasi drejtuesi i mjetit i kishte bërë disa herë manovrime gjatë rrugës së Rinasit. Dhe mesa duket personat që ndodheshin në këtë automjet nuk e kanë kapërdirë këtë gjë. Kjo “alibi” e paraqitur nga policia rrëzohet nga fakti që personat që e kanë rrahur i kanë thënë biznesmenit “ik nga Shqipëria”.
Por në anë tjetër, përkundër versionit të policisë, dyshohet se ai është dhunuar pikërisht për shkak të investimit gjigand që po realizon në Gjirin e Lalzit. Dy ditë më parë, persona të panjohur janë përplasur qëllimisht me makinën tip “Mitsubishi”, me të cilën ishte duke udhëtuar biznesmeni.
Agresorët sapo kanë dalë nga makina, kanë ushtruar dhunë ndaj 54vjeçarit si dhe drejtuesit të mjetit, personit me iniciale E.M.. Ngjarja u shënua pasditen e së shtunës në kryqëzimin e Laknasit me rrugën e Rinasit.
Ndërkaq, burimet e sipërpërmendura thanë më tej se përveç kësaj, një pistë tjetër e hetimit është edhe ajo e ndonjë konflikti të mundshëm që ai mund të ketë për shkak të pozicionit që ka.
Faad Mitri është administrator i një kompanie që investon një resort në Gjirin e Lalzit.
