Festivali “Kënga Magjike” edhe këtë vit nuk ka kaluar pa debate. Konflikte për votën, mënyrën e votimit, apo akuzat për këngë të kopjuara kanë qenë në qendër të vëmendjes mbrëmjen e festivalit dhe ditët e tjera pasuese.
Megjithatë, ajo që bëri më shumë jehonë ishte një deklaratë e Devis Xherahut, që akuzonte fituesen Rozana Radi, për të cilën tha se nuk e meritonte çmimin dhe nuk është këngëtare. Rozana rrëfen për “Bluetooth” se si i ka përjetuar këto sulme të kolegut të saj, por edhe debatet e tjera post-”Kënga Magjike”. “Të jem e sinqertë, publiku e pëlqeu këngën sapo doli, po ashtu dhe kolegët artistë, të cilët e postuan masivisht në rrjetet sociale. E prisja, por deri sa e mora nuk e besoja. Debateve nuk i ikim dot. Unë do preferoja që debatet të bëheshin para se të kalosh ujin, jo pasi e ke kaluar”, ka thënë Rozana, teksa ka dhënë edhe një përgjigje rreth komenteve që janë bërë për atë nga kolegë të ndryshëm.
“Nuk kam pasur as nuk dua të kem debat me Devisin. Se di përse! Dhe nëse do ta dish, as që më intereson fare”, ka thënë Rozana. Ajo ka folur edhe rreth projekti më të ri televiziv që ka të bëjë me një emision investigativ. “Është një eksperiencë e re për mua. Është një emision që mendoj që do japi një kontribut të madh për përmirësimin e shoqërisë tonë në përgjithësi. Është një emision, ndër të tjera, që ka dhe satirën brenda, për këtë mendoj se mund ta bëj mirë. Duhet të presim më tepër tema sociale, meqë përbëhet nga një staf me vetëm femra? Ne sapo kemi startuar. Nuk do tregoj shumë për “Boom”-in, vetëm po ju them që do t’ju plasi bomba në dorë shumë shpejt”, ka thënë ajo.
