Gjykata e Lartë ka ndryshuar masën e sigurisë për Kryetarin e Bashkisë së Kavajës, Elvis Rroshi. Prej Qershorit ai qëndronte në arrest shtëpie, ndërsa këtë të mërkurë togat e zeza kanë caktuar masën e detyrimit për t’u paraqitur një herë në Prokurori.
Avokati mbrojtës, Theodhori Sollaku, tha se klienti i tij mund të kthehet nesër në punë dhe të ushtrojë detyrën e kryebashkiakut.
Elvis Rroshi u arrestua në muajin Qershor për falsikimin e dokumeteve. Ai akuzohet të ketë falsifikuar formularin e vetëdeklarimit të dekriminalizimit duke fshehur të dhëna që tregojnë se ai ka qenë i dënuar në Itali për një vepër penale të kryer në vitin 1992.
Sipas Prokurorisë, Elvis Rroshi nuk ka deklaruar një dënim të dhënë në mungesë për përdhunim. Po ashtu, sipas akuzës, ai është dëbuar nga shteti italian dhe ai zviceran në vitet 1993 dhe 1995 dhe nuk ka deklaruar se është arrestuar në Gusht të vitit 1997 në Zvicër.
Për dënimin në Itali, Rroshi pati sqaruar se nuk kishte patur dijeni dhe se avokatët e tij po punonin për ta sqaruar çështjen.
Ndryshim i masës së sigurisë për Elvis Rroshin vjen dy ditë pas publikimit të një raporti të misionit PAMECA IV, në të cilin thuhej se ndalimi i Kryetarit të Bashkisë së Kavajës ishte bërë pa asnjë arsyetim serioz ligjor. /tv Klan
