Komisioni Qendror i Zgjedhjeve ndërpreu mandatin e deputetëve Aqif Rakipi dhe Gledion Rehovica, duke konfirmuar në këtë mënyrë kërkesat e prokurores Rovena Gashi.
Ish-drejtuesja e “Dekriminalizimit” në Prokurorinë e Përgjithshme u largua nga Kryeprokurja e Përkohshme, Arta Marku, menjëherë pas dërgimit të materialeve për dy deputetët në KQZ.
Kjo u duk të ishte dhe një nga arsyet e largimit të saj nga drejtimi i dekriminalizimit, sektor që vetëm pak muaj më parë i hoqi mandatin dhe të paktën 6 deputetëve të tjerë.
Kërkesa për heqjen e mandatit të dy deputetëve turbulloi ujrat e politikës që dukej të ishte pak më e qetë pas ngjarjeve të fundit në parlament. Edhe pse e “bekuar’ nga socialistët dhe e deklaruar si e përkohshme, kryeprokurorja e re nuk duket se e konsideron të tillë detyrën qe ka marrë.
Të paktën këtë dëshmojnë veprimet e saj në ndryshimet që ka ndërmarrë në disa drejtori kyçe. Siç ishte dhe largimi i zonjës Gashi vetëm një ditë pas kërkesës së saj për heqjen e mandatit të dy deputetëve, duke u zëvendësuar me prokurorin Arqile Koça.
Prokuroria e Përgjithshme nuk sqaroi arsyet e kësaj vendimmarrjeje. Por, nga ana tjetër, Partia Demokratike, nëpërmjet një qëndrimi zyrtar e lidh largimin e prokurores pikërisht me kërkesën për heqjen e mandatit të deputetit Aqif Rakipi. Ky i fundit edhe pse është zgjedhur deputet me PDIU-në, ka votuar dhe mbështetur haptas PS dhe kryeministrin Rama.
