Rivali i Skënderbeut, Lokomotiva e Moskës në krizë

Vazhdon forma e dobët e Lokomotivës së Moskës, kundërshtarit të ardhshëm të Skënderbeut në grupin H të Europa League. Skuadra e trajnerit Cherevchenko regjistroi të 4-tën ndeshje radhazi pa fitore pasi barazoi 2-2 në sfidën e vlefshme për javën e 18-të të kampionatit rus ndaj Ural-it. Pas disfatave ndaj Anzhit dhe Sportingut për Lokomtivën vinë dy barazime radhazi fillimisht ndaj Dynamos së Moskës në derbi dhe tashmë ndaj një ekipi të dobët si Urali. Në takimin e zhvilluar në Lokomotiv Stadium ishin miqtë nga Yekaterinburgu ata që kaluan të parët në avantazh. Pa u mbushur ende 2 minuta lojë Sapeta ndëshkoi portierin vendas Guilliherme. Megjithatë Miranchuk riktheu qetësinë te Lokomotiva duke barazuar shifrat në minutën 17-të. Për ti dhënë sërish avantazhin Uralit mendoi Manucharyan që në minutën 39-të e coi në 1-2 rezultatin. Presioni i moskovitëve drejt portës së mbrojtur nga Zhevnov u rrit ndjeshëm në pjesën e dytë, fraksion në të cilin Lokomotiva arriti të barazonte shifrat me Niassen në të 80-tën. Deri në fund rezultati nuk ndryshoi më me dy skuadrat që ndanë nga një pikë. Pas këtij barazimi Lokomotiva e Moskës zbriti në vendin e tretë të kampionatit rus në kuotën e 32 pikëve. Ndeshja mes Skëndërbeut dhe Lokomotivës do të zhvillohet të Enjten e ardhshme në Elbasan Arena, një sfidë në të cilën korcarët do të kërkojnë fitoren e dytë në grupin H, për ta mbyllur në mënyrën më të mirë aventurën e tyre në Europa League.