Në Lojërat Olimpike “Rio 2016” ndodhet vetëm një atlete ruse dhe ajo është Darya Klishina, e cila garon në disiplinën e kërcimit se gjati. Dje janë zhvilluar bateritë eliminatore dhe ajo siguroi një vend për në finale, pasi kërceu 6.64 metra, duke u renditur në vendin e tetë. Por ajo ka tërhequr vëmendjen e publikut për pamjen dhe trupin e saj.
Ajo i shpëtoi pezullimit të Federatës Ndërkombëtare të Atletikës (IAAF) pasi jeton e stërvitet në Amerikë, larg Rusisë së përfshirë nga skandali doping. Për këtë arsye, ajo mori “dritën jeshile” për të qenë në “Rio 2016” edhe pse pak ditë më parë u pezullua përkohësisht nga IAAF.
Por Klishina e apeloi pranë një zyre të CAS (Gjykata e Arbitrazhit Sportiv) të ngritur në Olimpiadë enkas për çështje të tilla dhe fitoi të drejtën të garojë. Por Klishina nuk është vetëm një sportiste, por edhe një vajzë seksi, që me trupin e saj ka bërë për vete miliona fansa anembanë botës.
Klishina është 25 vjeçe dhe është kampione e Europës në sallat e mbyllura në kërcim së gjati në vitet 2011 e 2013. Rezultati i saj më i mirë është 7.05 metra dhe në “Rio 2016” nuk pretendon shumë. “Më lanë shumë pa stërvitje këto ditë, ndaj do të përpiqem të arrij maksimumin”, tha sot Klishina pasi siguroi finalen.
