Gara e fundit individuale në një Olimpiadë e Majkëll Felps nuk prodhoi një tjetër medalje të artë për amerikanin, por ishte gjithsesi historike. Felps nuk u ngjit për herë të parë në karrierën e tij olimpike në shkallën më të lartë të podiumit në garën e 100 metrave flutur, i mundur nga Xhozef Skulling, një djalosh 21 vjeçar nga Singapori i cili vendosi rekord të ri olimpik, 50,39 sekonda, gjatë duelit me “Peshkaqenin”.
Pas tij, Felps preku murin e finishit në të njëjtën kohë me Çad Le Klos të Afrikës së Jugut dhe Laszlo Çeh të Hungarisë, pasi të gjithë regjistruan kohën 51,14 sekonda dhe morën të tre medaljen e argjendtë.
“Kjo është një mënyrë krejtësisht e çmendur për të mbyllur karrierën time individuale”, tha Felps pas garës duke buzëqeshur megjithëse kishte humbur medaljen e artë. “Ishim të tre me të njëjtën kohë në vendin e dytë. Barazimi i një tresheje është diçka e çmendur. Pastaj Xhozef është shumë i fortë”, tha ai duke folur për fituesin 21-vjeçar.
Ky i fundit ishte shumë i emocionuar nga ajo që kishte ndodhur dhe kjo dukej qartësisht edhe në momentin kur vari në qafë medaljen e parë të artë olimpike në historinë e Singaporit, të cilën e kishte marrë pasi kishte mundur idhullin e tij. Ai u tregoi vetë mediave një foto të tijën përkrah Felps në vitin 2008.
“Është e mrekullueshme vetëm të notosh përkrah Felps dhe gjithë këtyre emrave të njohur. Është e pabesueshme”, tha Skulling i cili jeton në SHBA dhe stërvitet atje.
