Dita e katërt e rinumërimit të votave të Tiranës u mbyll me rivlerësimin e 436 qendrave të votimit dhe ndryshe nga sa pritej, partitë kryesore kanë rezultuar me vota të pamerituara në kuti.
Koalicioni i PD ka humbur deri tani 219 vota, ndërsa PS 193. As subjektet më të vogla nuk mbeten pas. Koaliconi nisma “Shqipëria Bëhet” rezulton me 26 vota të pamerituara, PSD 23, Lëvizja Bashkë 10 vota.
Ndërsa partia Mundësia që po lufton për të ruajtur mandatin e dytë, ka humbur 8 vota.
Vota të pamerituara në kuti janë gjetur edhe në radhët e kandidatëve. Nga kampi blu, Ilir Alimehmeti ka humbur 61 vota, Jorida Tabaku 22 vota, Ilir Metaj 28 vota, etj.
Ndërsa nga radhët e socialistëve, Ervin Hoxha rezulton me 193 vota të pamerituara, Xhemal Qefalia 125, Fatmir Xhafaj me 82 vota i ndjekur nga Blendi Gonxhja, Kejsi Elezi, Roy Bashaj, Anila Denaj dhe Erion Brace.
Gara mbetet e hapur për Blerina Gjylametin dhe Olta Xhackën, pasi diferenca është ngushtuar.
KAS ka vendos të quajë të sakta vetëm ato fletë votimi ku shenja “X” ose “+” është vendosur saktësisht brenda kutisë së bardhë para emrit të kandidatit dhe ka shpallur të pavlefshme çdo votë tjetër ku shënimi për kandidatin është bërë në një formë tjetër. Kjo ka bërë që shumë figura të njohura nga të dy krahët të humbasin vota.
PS shprehu shqetësimin për këtë formë vlerësimi duke kërkuar të ndryshohej, por që Komisioni i Ankimimeve dhe Sanksioneve e rrëzoi.
