Drejtuesi Politik i Partisë Demokratike për qarkun Tiranë, Belind Këlliçi, ishte sot i ftuar në studion e “Përballë Lajmit”, në Klan News, për të folur për procesin e rinumërimit të votave të 11 majit.
E ndërsa nga procesi i rinumërimit të qarkut Tiranë, deri më tani janë vërejtur diferenca të ndryshme të votave, por deri më tani konsiderohen gabime njerezore.
I pyetur nëse do të kishte rizgjedhje, a do të pasonte ne rezultate të ndryshme nga ato të 11 majit, Këlliçi shprehet se padyshim do të kishte.
“Patjetër që po. Këtu nuk po kërkohet pushtet në tavolinë. Këtu po kërkohet për standarde të zgjedhjeve”, tha ai.
Demokrati sakaq, teksa listoi e një herë denoncimet e bëra prej kësaj forcë politike për zgjedhjet e 11 majit, theksoi dhe akuzën e tyre për lidhjet e Partisë Socialiste me botën e krimit, si një avantazh për fitimin e procesit zgjedhor.
“Që të jemi të qartë. Ne, edhe para ditës së zgjedhjeve, edhe pas ditës së zgjedhjeve, nuk kemi reshtur së denoncuari të gjithë fenomenët e transformimit të vullnetit të qytetarëve, e kapjes së votës, e blerjes së votave, e të tjerë, e të tjerë. Të gjitha këto fenomene që unë po ju përmend tani, së bashku me zyrat elektorale të padeklaruara që ne i kemi denoncuar, së bashku me bonusin e pensioneve 100 euro që është shkelje flagrante e ligjit, që janë 48% e votuesve, në periudhë që nuk lejohet me ligj. Së bashku me amnistinë totale të gjobave me dt 9 maj, në ditën e fundit të fushatës. Së bashku me 500 milionë euro tendera që janë vënë në periudhë të ndaluar me ligj fushate për bizneset, për t’u përdorur një pjesë e parave për fushatë. Padiskutim, së bashku shpqëruar me ndikimin e krimit të organizuar, kur ne kemi për herë të parë, denoncuar me emër deputetët sipas qarqeve që mbështeten nga bandat kriminale, ne gjykojmë që këtu qëndron avantazhi i pamerituar i PS-së për të marrë mazhorancën”, tha ai.
“Roli i SPAK-ut ku është?”, pyet Këlliçi, teksa shprehet se nga të gjitha denoncimet e bëra prej Partisë Demokratike, nuk ka asnjë reagim nga task forca e ngritur nga Prokuroria e Posaçme dhe Komisioni Qendror i Zgjedhjeve, për mbarëvajtjen e këtij procesi.
“Ne kemi një javë, që ka dalë zoti Berisha. Ka dalë në media, ka dalë në selinë e Partisë Demokratike, në mënyrë të përsëritur, pra jo vetëm një herë dhe ka nxjerrë video autentike të personave që votojnë. Dikush voton tre herë, dikush katër herë, dikush kërcënon apo intimidon një votues, dikush tjetër bën një krim zgjedhor. Sot që ne flasim, kanë kaluar një javë apo dhjetë ditë, nuk ka asnjë reagim. Zero reagim nga task forca e SPAK-ut, që u ngrit pikërisht për të ndaluar këto fenomene”, tha ai.
Por çfarë do të ndodhë tani me Partinë Demokratike? Sipas Këlliçit, demokratët do të vijojnë me denoncimet e mëtejshme që sipas tyre përbëjnë krime elektorale.
“Ne kemi për detyrë, që deri në ditën kur të përpilohet raporti përfundimtar i OSBE-ODIHR për zgjedhjet, që në një farë mënyrë është dhe vendosja e kapakut për këtë process zgjedhor, ne do të denoncojmë çdo provë, çdo fakt”, u shpreh ai.
Por përse Partia Demokratike ende nuk ka një analizë të detajuar lidhur me zgjedhjet e 11 majit? Këlliçi sqaroi se i gjithë fokusi i demokratëve aktualisht është tek denoncimi i krimeve zgjedhore, edhe pse një analizë është e domosdoshme për shkak të “ngërçeve” të brendshme të partisë, por kjo duket se është në plan të dytë.
“Ne kemi rreth pesë javë që kanë mbaruar zgjedhjet. Nëse këto pesë javë, ne do të ishim marrë me analizën e zgjedhjeve për së brendshmi, me evidentimin e problematikave dhe pikave tona të dobëta, që janë sa të duash, me përgjegjësitë e secilit prej nesh, pa përjashtuar këtu as veten time, sigurisht do kishim humbur ‘trenin’ e denoncimeve. Pra, e gjithë energjia dhe fokusi i Partisë Demokratike, duke nisur nga kreu i saj deri tek anëtari më i fundit, është në evidentimin e shkeljeve në procesin zgjedhor në 12 qarqe”, tha ai./tvklan.al
