Përfundimi i raundit të eliminatoreve për Kampionatin Europian të Futbollit në vitin 2020 përkon edhe me përfundimin e kontratës së trajnerit të Kombëtares, Edi Reja. Federata Shqiptare e Futbollit do ti ofrojë një kontratë të re 74-vjeçarit por mediat italiane e shohin të vështirë rinovimin e teknikut italian.
Presidenti i FSHF, Armand Duka ka deklaruar gjatë gjithë periudhës përpara dy ndeshjeve të fundit të Shqipërisë, asaj me Andorrën dhe me Francën, se marrëdhëniet me Rejan janë shumë të mira dhe rinovimi nuk është një çështje në diskutim.
Mësohet se trajnerit i është ofruar një kontratë 4 vjeçare në krye të pankinës kuq-e-zi. Megjithatë ai ka kërkuar që kontrata të jetë 2-vjeçare, duke marrë parasysh edhe moshën e tij.
Është e diskutueshme se sa mund të ndikojë kjo pikë në mos arritjen e një marrëveshjeje mes palëve.
Megjithatë, zërat se Reja do të largohet nga drejtimi i kombëtares përforcohen edhe më shumë nga mediat fqinje. Sipas prestigjiozes italiane “Gazzetta Dello Sport” pavarësisht se do të ketë një takim mes Rejas dhe presidentit të FSHF-së, Armand Duka gjasat që të arrihet një marrëveshje janë të pakta.
“Ndërkohë trajneri Reja po mbyll eksperiencën shqiptare. Kontrata ka mbaruar në ndeshjen e fundit kualifikuese. Trajneri do të takohet me presidentin e federatës por divorci duket i paevitueshëm”, shkruan “Gazzetta dello Sport”.
Edi Reja me Shqipërinë ka zhvilluar deri tani në total 8 ndeshje duke regjistruar 3 fitore 1 barazim dhe 4 humbje. Në rast se ai do të arrijë një marrëveshje me FSHF, rroga e tij vjetore përllogaritet të jetë 300 mijë euro. /Opinion.al
