Ka rinisur në Gjykatën e Elbasanit seanca ndaj ish-kreut të ARRSH-së, Dashamir Xhika dhe nëntë të pandehurve të tjerë të arrestuar për korrupsion.
Mësohet se prokurorja Armanda Xhaferri ka kërkuar largimin e medias nga salla e gjyqit me argumentin se do të paraqiten dokumente që janë sekret hetimor.
Pjesa e parë e seancës është shoqëruar me tension dhe debate, pasi avokatët kërkuan tërheqjen nga çështja të gjykatëses Idushe Maliqi dhe Prokurores Armanda Xhaferi me arsyetimin se kanë shkelur procedurat për arrestimin dhe kontrollin e banesave të të pandehurve mbrëmjen e së enjtes.
E gjendur përballë një kërkese të tillë, gjyqtarja Maliqi u tërhoq nga trupa gjykuese dhe për rrjedhojë seanca u shty për të filluar pak orë më vonë.
Gjyqtare e çështjes me gjithë kërkesën e avokatëve mbetet Idush Maliqi, pasi u rrëzua kërkesa e tyre për dorëheqjen e saj pas shqyrtimit që iu bë kësaj kërkese.
Në seancën e sotme, ish-Drejtori i Përgjithshëm i Rrugëve, Dashamir Xhika, doli para trupit gjykues i qetë dhe me pranga në duar.
Ish-funksionari i LSI, akuzohet nga Prokuroria e Elbasanit bashkë me të edhe paraardhësin e tij Andi Toma për abuzime me tendera, vlera të cilave shkon deri në 5 miliardë lekë.
Gjatë gjithë kohës që zhvillohej seanca gjyqësore, në sallën e gjyqit qëndronte edhe deputeti i LSI në Qarkun e Elbasanit, Edmond Haxhinasto.
Përveç Xhikës dhe Tomës, të arrestuar janë edhe 3 familjarët e familjes Hysa të cilët ndërtuan segmentin Elbasan-Gjinar. Ndërkohë në gjendje të lirë po hetohen edhe 5 persona të tjerë të cilët kanë pasur rolin e mbikëqyrësit të segmentit rrugor.
