Mëngjesin e sotëm Inspektorati Kombëtar për Mbrojtjen e Territorit ka nisur aksionin për prishjen e disa objekteve në zonën e Astirit.
Sot është parashikuar të prishen 25-30 objekte ku përfshihen dyqane dhe banesa. Këto i përkasin lotit të dytë të projektit të Unazës së Re.
Që prej nisjes së aksionit në zonë ka patur prezencë të shtuar të policisë e cila ka bllokuar aksin nga rethrrotullimi i Astirit deri tek ish-sheshi Shqiponja, ndërkohë që trafiku është devijuar dhe automjetet duhet të kalojnë në rrugën që lidh zonën e Astirit me Mëzezin.
Në lotin e parë deri tani janë prishur 41 objekte nga aksioni i IKMT-së. Në lidhje me aksionin e sotëm banorët janë lajmëruar në datën 17 shkurt për të liruar objektet.
Kujtojmë se në zonën e Astrit u protestua për muaj me radhë nga banorët të cilët pretendojnë se prishja e objekteve të tyre po bëhet në kundërshtim me ligjin. Gjendja e rëndua më shumë pas publikimit të skandalit me kompaninë e cila kishte fituar tenderin për ndërtimin e lotit të parë, ‘DH Albania’. Ajo rezultoi se ishte një kompani ‘fantazmë’ me dokumenta të falsifikuara, madje kishte fabrikuar edhe vulën e shtetit Delaware në SHBA. Në lidhje me këtë çështje ka nisur një hetim por ende nuk ka rezultate.
Megjithatë aksioni i prishjes së banesave që prej fillimit të tij ka vazhduar normalisht duke bërë kështu që banorët të tërhiqen nga kërkesat e tyre. Partia Demokratike e cila ka dalë në krahë të banorëve që në ditën e parë të protestave ka premtuar se do t’i dëmshpërblejë ata në momentin që do të vijë në qeverisje. /Opinion.al
