Mirdita tashmë ka një spital të ri, i cili ofron shërbim shëndetësor për rreth 50 mijë banorë.
Ky lajm është bërë i ditur nga vetë kryeministri Edi Rama, përmes një postimi në rrjete sociale.
Ai ka ndarë pamjet e këtij spitali, teksa shkruan se është një investim me rëndësi në shëndetësi.
“Mirëmëngjes, dhe me Spitalin e rilindur të Mirditës, një tjetër investim me rëndësi në shëndetësi, i cili do të ofrojë shërbim shëndetësor për rreth 50 mijë banorë, ju uroj një ditë të mbarë”, shkruan ai në Facebook-un e tij.
Spitali i Mirditës u dëmtua nga tërmeti i vitit 2019 dhe në shtator të vitit 2022 iu nënshtrua rikonstruksionit, në kuadër të Rindërtimit. Ky spital ofron shërbimet patologji e përgjithshme, kirurgji të përgjithshme, reanimacion, pediatri, maternitet, poliklinika, urgjenca, laboratori klinik-biokimik, shërbimi i imazherisë dhe farmaci.
