Projektligji për rimëkëmbje ekonomike në Kosovë është votuar këtë të premte në Kuvend.
Kyeministri Avdullah Hoti në një konferencë për media ka thënë se 212 milionë euro është shifra që besohet se qytetarët do të tërheqin nga Trusti i Kursimeve Pensionale të Kosovës.
“Rreth 600 milionë euro arrin vlera e projektligjit për rimëkëmbje ekonomike, nga i cili do të përfitojnë bizneset dhe qytetarët”,-ka thënë kryeministri i Kosovës Avdullah Hoti.
Sipas projektligjit të votuar sot në Kuvend, nëse një tatimpagues tërheq deri në 10 për qind të kursimeve deri në vlerë të 10,000 eurove, Qeveria e Kosovës do ta kompensojë brenda pesë viteve të ardhshëm.
Ndërkohë që 200 milionë euro janë parashikuar në buxhetin e vitit të ardhshëm për bizneset si dhe një vlerë prej 20 milionë eurosh është planifikuar për punëtorët të cilët kanë humbur punën për shkak të pandemisë.
Ky projektligj, i cili shndërrohet në ligj pas dekretimit nga ana e Presidentit të Kosovës do të mbetet në fuqi deri më 31 dhjetor 2021, duke përjashtuar disa dispozitave që do të jenë të vlefshme deri në vitin 2028.
