Kryeministri Edi Rama e ka nisur ditën me një urim special për gjithë shqiptarët, duke postuar në faqen e tij në FB videon pas restaurimit të pikturës së famshme të gojëdhënave të bukura “Zoja e Shkodrës”, të cilën e cilëson një rilindje rrëqethëse.
Poshtë postimit janë lumë komentet me përgëzime për punën e lavdërueshme, por nuk mungojnë edhe këshillat e sugjerimet. Një prej tyre i kërkon të bëjë kujdes se po përgatiten ta djegin vendin si në 1997.
Postimi i Ramës:
MIRËMËNGJES
dhe ju uroj një fundjavë të mbarë me këtë video të punës mbresëlënëse për restaurimin e pikturës së famshme të gojëdhënave të bukura “Zoja e Shkodrës”.
I’a vlen ta shihni çfarë rilindjeje rrëqethëse!
Kjo kryevepër që i mbijetoi për habinë e një mrekullie përndjekjes së regjimit komunist, u përndoq për së dyti 25 vjet me radhë prej harresës së institucioneve që deri 3 vjet e gjysëm më parë, i lanë pasuritë e paçmueshme të thesarit të kulturës sonë në harresën e një shpërfilljeje rrënuese.
Por më 25 prill, në 550 vjetorin e ditës qëkur ikona e parë e Pajtores së Shqipërisë u përcoll mrekullisht nga Shkodra drejt Genazzano-s në Itali, ku ndodhet edhe sot, kjo kryevepër e 1800-ës do të rishfaqet e rilindur në Katedralen e Shkodrës, falë bashkepunimit të Ministrise së Kulturës me laboratorët e ekselencës së institutit Palazzo Spinelli në Firence.
