Çdo ditë Kryeministri Edi Rama promovon atë që vetë e quan Rilindje Urbane. Rama poston foto të shesheve të qyteteve që po rikonstruktohen. Po me rrugët çfarë ndodh? A janë ato pjesë e Rilindjes së Kryeministrit?
Faktet tregojnë që Jo. Revista ekonomike Monitor ka botuar sot të plotë pasqyrën e shpenzimeve publike, ku shihet qartë se në 6 mujorin e parë të vitit, është ezauruar vetëm 23 për qind e fondit për rrugët.
Kështu në fund të 6-mujorit të parë investimet në infrastrukturën rrugore janë realizuar vetëm 23% të fondit vjetor. Sipas të dhënave të detajuara nga Ministria e Financave për ecurinë e projekteve të investimeve shihet se për gjysmën e parë të vitit janë realizuar vetëm 1.9 miliardë lekë nga 7.6 miliardë lekë të planifikuara për të gjithë vitin.
Ecuri të dobët kanë projektet e mëdha të infrastrukturës. Nga 2.7 miliardë lekë që ishin planifikuar për by pass-et e Fierit dhe Vlorës nuk është disbursuar asnjë lek në gjysmën e parë të vitit.
Tabelat bashkangjitur këti shkrimi tregojnë se projektet e financimet për ndërtimin e rrugëve janë në nivelin zero.
Fondi prej 7.6 miliardë lekë ose 55 milionë euro është copëzuar në gati 250 projekte. Hallakatja e fondeve në këtë mënyrë nuk siguron ndërtimin e një vepre të dukshme për sytë e publikut, thonë ekspertët.
Në buxhetin e vitit 2016, qeveria i shkurtoi me 40% fondet për transportin rrugor duke i çuar ato në nivelin më të ulët të dekadës. Fondi i dedikuar transportit rrugor është vetëm 12 miliardë lekë, nga të cilat pak më shumë se 8 miliardë janë financime të huaja.
Por duke marrë në konsideratë faktin se financimet e huaja në infrastrukturë nuk janë ezauruar më shumë se 40%, fondi dedikuar transportit rrugor nuk është i mjaftueshëm as për mirëmbajtjen.
*Më poshtë të dhënat për investimet në rrugë për 6 mujorin e parë të 2016
