Nga Albatros Rexhaj
Kur një artist thyhet diçka e madhe përmbyset nga brenda, sepse mënyra si një artist e përjeton dhimbjen shkon përtej të zakonshmes. Ashtu siç e përqafon të bukurën, dhe atë, me artin e vet, ia pasqyron të gjithë botës, artisti, po njësoj, e përqafon edhe dhimbjen dhe të gjithën e ndrydh në vete. Prandaj edhe i jap shumë të drejtë Blendi Fevziut kur thotë që jetesa në Penn Station, si e pastrehë, është zgjedhje e Parashqevi Simakut, është mënyrë për t’i dhënë një kuptim dhimbjes brenda vetes. Por ajo që Parashqevia nuk ka mundur ta imagjinojë është që, ashtu siç ndër vite ia kemi ndier bukurinë e artit, po njësoj tani e kemi ndier edhe dhimbjen e saj. Aty këtu mund të dalë ndonjë që synon të bëjë interesantin me komente e teori dashakeqe, por shumica dërrmuese e shqiptarëve duan të jenë afër idhullit të rinisë së tyre.
Jam krenar që i takoj brezit ku të gjithë, të vegjël e të mëdhenj, ushqenim dashuri platonike për Parashqevinë. Edhe unë jam një nga ata që ka ngelur i ngujuar, me telefon në dorë, që nga momenti kur Blendi Fevziu e ka publikuar videon e transmetuar nga ABC7, hera herës pa frymë, e hera herës në lot nga trishtimi që ndieja. E kisha shumë të vështirë që të bëja lidhjen mes asaj që më shihnin sytë dhe idhullit të fëmijërisë sime. Gjithçka ishte thjesht shumë e rëndë.
E pranoj që gjithsecili ka mendimin e vet, dhe po ashtu e pranoj që ka shumë njerëz hallexhinj, nga pensionistet me 8000 lekë të reja e kushedi çfarë tjetër, por, përkundër listës së gjatë të halleve dhe nevojave, fuqia dhe vlera e një kombi matet edhe nga mënyra si i trajton ikonat e veta. Dhe Parashqevia ishte, është dhe do të ngelet ikonë që i mbijeton kohëve dhe sistemeve. Dhe si e tillë ajo e meriton simpatinë, ndihmën dhe kujdesin tonë.
Kisha dëgjuar zëra që Elton Ilirjani është një njeri me zemër të madhe, dhe vërtet jemi me fat që këto nuk dolën thjesht fjalë. Me 12 milionë ndjekës në instagram, dhe me miliona dollarë pasuri, Eltoni nuk ka nevojë për vëmendjen dhe klikimet e shqiptarëve. Shihet nga avioni që gjithçka është e pastër dhe e sinqertë.
Sot jetojmë në kohë rrjetesh sociale. Transmetimi pothuajse LIVE i situatës (me video, me postime e story) është thjesht mënyra si sot funksionon bota. Dhe, me mjetet e kohës, Eltoni u bë ura e shqiptarëve me Parashqevinë. Ai e bëri atë që do të duhej ta bënte shteti, sado që lista e halleve dhe e nevojave është e gjatë. Uroj vetëm që të mos zhgënjehet nga ndonjë koment idiot që mund të shfaqet rrugës.
Nuk e di nëse Parashqevi Simaku do t’i kthehet muzikës (personalisht do të doja të shkoja në një koncert solemn të sajin), por uroj nga zemra që ajo të rimëkëmbet, ta marrë veten dhe të shkëlqejë përsëri. Jam shumë i bindur që vetëm kështu, duke e kuruar trupin dhe shpirtin, do të gjejë rrugën e bashkimit me të birin. Edhe Zoti është gjithmonë në anën e një nëne, dhe nuk kam asnjë dyshim që do të jetë edhe në anën e Parashqevisë.
P.S
Me kujdesin e treguar gjatë postimit të videos së transmetuar nga ABC7, dhe sidomos me kujdesin që të mos ndajë me opinionin shumë nga informacionet e natyrës private mbi jetën e Parashqevisë, Blendi Fevziu ka treguar një etikë të lartë profesionale që mungon në diskursin tonë publik. Si një fans i përjetshëm i Parashqevisë ndihem thellësisht falënderues.
