Së fundmi, italiani Davide Pecorelli ka publikuar një “selfie” me thasë plot me monedha ari të thesarit të Montekristos. Në kokë mban të njëjtën kapele me të cilën shkoi për herë të parë në prokurorinë e Perugias.
“Nuk është fotomontazh”, thekson sipërmarrësi, i cili rikthehet të flasë pas disa muajsh reflektim. Por ku ndodhet thesari? “Për momentin nuk mund të them asgjë”,-shton ai.
La Nazione shkruan se fotot janë shkrepur në brendësi të garazhit misterioz të Porto Santo Stefano, të cilat posedohen edhe nga Prokuroria e Grosseto, që hetoi 46-vjeçarin për të gjetur monedhat e vjedhura në 2019-n në Sovana, u bënë publike nga vetë Pecorelli, i cili më 29 mars u mor në pyetje për 4 orë në Perugia, përmes një letër porosie ndërkombëtare të prokurorisë së Pukës në Shqipëri.
Sipërmarrësi u mor në pyetje nga hetuesit e Perugias që kanë kundërshtuar 3 veprat penale për të cilat po hetohet në Shqipëri, që janë zjarrvënia, dhunim të varreve dhe kalim të paligjshëm të kufirit.
Pecorelli ka thënë se para hetuesve përsëriti atë që kishte ndodhur në fillim të janarit në Shqipëri.
“Ata insistuan mbi të gjitha për të ditur identitetin e priftit që e ndihmoi për të inskenuar zjarrin në makinë, pra “vetëvrasjen time”. Por unë nuk do ta zbuloj identitetin e tij”,-tha italiani.
Davide Pecorelli shpreson që në Shqipëri t’ia hedhë maksimumi më një gjobë, ndonëse Kodi Penal në vendin tonë parashikon deri në 5 vjet heqje lirie për veprat penale për të cilat akuzohet. Por sërish, teksa përcjell këto të dhëna, media italiane shkruan se Pecorelli nuk është i mësuar të paguajë as borxhet.
Sipërmarrësi u gjet më 17 shtator të 2021, në bordin e një gomoneje pranë ishullit të Montekristos.
Pecorelli thotë se po shkruan një libër me të vërtetën e tij, të cilin shprehet do ta publikojë Shtatorin e ardhshëm ndërsa tregon se është tërhequr përfundimisht nga bota e sipërmarrjes dhe është punësuar në një agjenci në fushën e prodhimit.
Davide Pecorelli u bë i famshëm në Shqipëri dhe Itali në janar të 2021-t, kur u raportuar i humbur në Pukë, atje ku u gjet e djegur makina që ai kishte marrë me qira, brenda së cilës u gjetën edhe mbetje skeletore.
Ai zbuloi se gjatë kohës ishte shpallur i zhdukur kishte qëndruar në Vlorë, ku u shpreh se kishte shijuar detin dhe kishte luajtur futboll me miqtë e tij shqiptarë. Pecorelli ishte i martuar me një grua shqiptare me të cilën kishte një fëmijë dhe ishte pronar i disa bizneseve.
