Policia ka njoftuar se mëngjesin e sotëm në urgjencën e Elbasanit është paraqitur Ardian Çapja, i cili dyshohet të jetë plagosur me armë zjarri.
Familjarët e tij kanë deklaruar se ai është lënduar duke punuar në shtëpi dhe kanë mohuar të jetë plagosur me armë por tani 55-vjeçari është nisur drejt Tiranës për ndihmë më të specializuar.
Gazetarja Klodiana Lala raporton se Çapja ka qenë duke dalë nga banesa e tij, ndërsa dyshohet se disa persona i kanë hyrë nga pas, ku është një servis, dhe e kanë qëlluar në distancë. Disa minuta pasi ai është paraqitur në urgjencë, në zonën e Fushë Mbretit në Elbasan është gjetur një automjet i djegur brenda të cilit ka patur plumba. Kjo dihet pasi njëri nga zjarrëfikësit që po tentonte të shuante flakët është plagosur në këmbë pasi një nga plumbat ka shpërthyer nga nxehtësia.
Por plagosja e Ardia Çapjas në afërsi të shtëpisë së tij me armë zjarri nuk është lajm i mirë për Elbasanin.
Familja Çapja ka qenë shënjestra e masakrës së shkurtit të vitit 2016 ku në një lokal në pronësi të tyre u qëllua me kallashnikov dhe pati tre viktima dhe pesë të plagosur mes të cilëve dhe njëri nga vëllezërit e Ardian Çapjas.
Në mars të vitit 2019, në qendër të qytetit vritet në mes të Elbasanit, avokati i familjes Çapja, Ravik Gurra.
Të dyja ngjarjet e mësipërme janë ende të pa zbardhura. Ato dyshohet të jenë rezultat i konfliktit të grupeve kriminale në qytet për trafikun e drogës.
Familja Çapja ka gjithashtu probleme hasmërie. në vitin 2005, ku Sokol Çapja u përfshi në konflikt me ish-kreun e Qarkullimit Rrugor në Elbasan, Fadil Mema. Pas kësaj ngjarjeje mbeti i vrarë Sokol Çapja dhe si autorë u akuzuan nipat e oficerit të Policisë. Kjo pasoi me vrasjen e kunatit të Memës, Ardian Ibrahimi, në maj 2006.
Në vitin 2012, Gentian Beqiri, një nga të akuzuarit për vrasjen e Sokol Çapjes, u ekzekutua, ndërsa ishte lënë në arrest shtëpie. Ndërsa në mars 2015, në Torino të Italisë, u ekzekutua Fadil Mema.
Për këto ngjarje, nipi i Ardian Çapjas, Florenc Çapja ishte i dyshuari kryesor por ai u shpall i pafajëshm më herët gjatë këtij viti. / Opinion.al
