E gjithë bota është gati për të parë dhe një herë në fushë dy yjet e futbollit botëror apo ashtu siç i njohin të gjithë jashtëtokësorët e futbollit. Messi dhe Ronaldo do të luajnë këtë të enjte në një miqësore që me shumë gjasa do të jetë dueli i fundit përballë njëri-tjetrit, rivaliteti i famshëm mes dy lojtarëve dominoi botën e futbollit për më shumë se një dekadë dhe për këtë e gjithë vëmendja do të jetë në Arabinë Saudite.
Cristiano Ronaldo do të bëjë debutimin e bujshëm me Al-Nassr, përballë PSG të Leo Messit. Një miqësore luksi e kanë quajtur të gjithë dhe interesi ka qenë i jashtëzakonshëm. Kjo pasi mund të konsiderohet një rast unik për të parë edhe një herë në fushë Messi-n kundër Ronaldo-s, dy lojtarë që për 15 vite kanë dominuar skenën botërore. Në media raportohet se biletat kanë avulluar vetëm në pak minuta dhe pritët të jetë një stadium i mbushur nga tifozët.
Madje çmenduritë arrijnë deri aty sa njëri prej tyre ka paguar 2,5 milionë euro që të ndjekë dy lojtarët jo vetëm në fushë, por edhe në dhomat e zhveshjes. Në debutimin me klubin e ri, Cristiano Ronaldo do të mbajë numrin 7 në fanellën e tij, duke vazhduar një traditë e ndjekur nga Manchester United, Real Madrid apo dhe Juventus. Dueli do të luhet në orën 18:00 në stadium MrSool Park” në Riad.
